Tag Archive: EGYPT


أنا بعتذر على عدم الكتابة لمدة شهرين حاجة كدة .. بس صدقوني ده غصب عني جدا و مش بأيدي ! ..
في الفترة اللي فاتت تعددت الأسباب اللي أستفزت الناس علشان يرجعوا من تاني ميدان التحرير, منها محاكمة الثوار عسكريا , رجوع الشرطة بوحشيتها من جديد, قتل جنود مصريين على الحدود مع إسرائيل ولم تتخذ الحكومة أو المجلس العسكري أي خطوة تجاه الموقف ده لحد كتابتي للتدوينة دي , و التواطئ والتباطئ في المحاكمات لصناع الفساد, وأيضا عدم إتخاذ أي اجرائات قانونية في إسترداد الأموال المنهوبة و أيضا الحكم على ظباط 8 إبريل بعقوبات غليظة بسبب مساندتهم للشعب, وأيضا نشر الأكاذيب الواضحة بدون دلائل , إنعدام الأمن في حين ان العساكر يحرصون صينية ميدان التحرير بعدد كبير .. وان الشرطة بتكون موجودة قبل المظاهرات ب 5 ساعات في حين ان لو طلبتهم في مشكلة ممكن ميوصلوش وممكن يقلك انا مالي ولو فيه مصيبة بيوصل بعدها ب 3 أو 4 ساعات !.. والإعتداء على الألتراس الأهلي بدون سبب واضح للإعتداء عليهم ومازلوا ينشرون الرويات والأكاذيب عن الواقعة  .. فقرر الشباب انها تنزل من الميدان من جديد لكن في مسيرات من انحاء القاهرة .. و أيضا في ميادين التحرير الأخرى في باقي المحافظات المصرية و منهم ألتراس الوايت نايتس بسبب ما حدث لشباب الألتراس الأهلي في الإستاد من إعتدائات صريحة ضدهم بدون أسباب واضحة  من روض الفرج في شبرا ودي المسيرة اللي كنت مشترك فيها الحقيقة وكان شرف ليا اني اشارك في المسيرة دي بصراحة  وكانت الروح العظيمة الثورية عالية جدا بالرغم من شدة الحرارة وطول الطريق ..

حقوق الصورة والفيديو ليا انا .. و أي حد ممكن ينشرهم براحته .. لكن بعد إذنكم متحطوش حقوكم عليها, شكرا !

Advertisements

من ميدان التحرير هنقكلم قد أيه احنا ناس جميلة و روحنا حلوا و كلنا بنحب بلدنا ومستعديين نضحي بعمرنا علشان البلد تفضل مصر, مهما إختلف أشكالنا أو طبقاتنا الإجتماعية أو المكان اللي احنا منه كله مستعد للتضحية و كله بيحب البلد دي ولا مجال للحاقدين و الإنتهازيين !

Breaking News

لؤي إستحالة يكون هو بلطجي ومن رابع المستحيلات كمان !
الصورة دي صورتهاله يوم السبت اللي فات أثاء تصويري معاه أحد أجزاء فيلمي عن تاريخ الدولة الدينية و لؤي هو من أحد أكتر الشباب المثقفين في مصر والعالم العربي و لي الشرف بمعرفته معرفة شخصية الحمدلله وكان معايا يوم الأربعاء من الساعة 2 الصبح لحد 3 الصبح إنفصلنا بعدها للأسف غصب عننا وهو كان ضد اللي بيعمله الناس بالرغم من أن ده كان أقل حاجة يعملوها للدفاع عن نفسهم !!
#FreeLoai

الفيديو الأول : رجل يحكي سبب حدوث معركة التحرير .. ” الكلام كله مسئوليته الخاصة ”

الفيديو التاني : بداية الضرب وست كبيرة بتتكلم على اللي بيحصل قبل ماشوف بعنيا ” بتتكلم بتلقائية تامة بالمناسبة ”

الفيديو التالت : أحد المصابين بعد إصابته بإختناق من قنبلة الغاز

الفيديو الرابع : إعتراض المتظاهرين بإحداث ضوضاء ويرد عليهم الأمن المركزي بالقنابل

الفيديو الخامس : أول سيارة إسعاف بميدان التحرير, بعد كدة بقى فيه في كل شارع بتاع 7 عربيات وكان تقريبا مجموعهم 50 عربية.. وكانوا بيقولو في الميكرفون انهم هيعالجوا المصاب في نفس المكان, علشان الثوار مكانوش بيوفقوا انهم يركبوا عربية من خوفهم انهم يتخطفوا !

الفيديو السادس : الناس و هي بتصلي في الميدان ” طبعا ناس تانية بتقول علينا بلطجية في دي كانت أقرب حاجة تبينلكم قد أيه احنا بلطجية ” …

الفيديو السابع : نور أيمن نور بعد إصابته بشارع طلعت حرب, و إلتفاف بعض النشطاء و أصدقائه حواليه للإطمئنان عليه !!

الفيديو التامن : بعض المتظاهرين أثناء هتافتهم القوية التي كانت بتهز الميدان معظمهم من ثوار 25 وطبعا علشان برضه الناس اللي بتقول علينا بلطجية ..

الفيديو التاسع ” مش تصويري ده ” : الداخلية وهي بتشتمنا بألفاظ “وسخة” فللتحذير فيه ألفاظ قذرة !

أد أيه انا مشتاق للأيام دي و أد أيه إحنا كنا أيد واحدة وبنحمي بعض و مفيش بنت حد يقدر يلمسها ولا بيفكر حتى انه يبصلها بصة وحشة, جيه يوم وقف فيه أحد الثوار ليتحدى إحدى المدرعات, ليقف أمامها ويحمي باقي الثوار في أول يوم عظيم بثورة 25 يناير العظيمة, في هذا اليوم بالتحديد الذي خرج به عدة ألاف من المصريين عرف التاريخ مدى شجاعة هذا الشعب العظيم في التحدي و الإسرار مهما كان مدى القهر و الظلم ولن يرجع أبدا و هو منكسر, ” نحن خير أجناد الأرض ” وهذا ما قاله الله وسنمجد هذه الكلمات ونرتقي بها دايما. المرة دي بقى انا جبت ليكم فيديو لأحد الشباب أيضا الذي يتحدى مدرعة آخرى دون خوف من العسكري الذي يضرب بمدفعه للقنابل المسيلة للدموع أو دون خوف من المدرعة نفسها أو العساكر الذين يقفوا خلفها ليقفز على هذه المدرعة ويضرب هذا العسكري الذي يضرب عليهم القنابل المسيلة للدموع, كل من نزل هذه الثورة العظيمة أنا متأكد من كم الشجاعة اللي جواه… أسيبكم تتفرجوا على المشهد علشان انا بحاول أتكلم عن اللي جوة أو أحط مقدمة لكن انا متأكد ان الكلام لا يساوي المعنى الحقيقي لهذا المشهد !

التحرش الجنسي أصبح صفة من صفات معظم الشباب في العالم العربي, تقريبا أصبح هواية عند الشباب دي أكتر من هوايتهم للرياضة مثلا بقت ممارستهم للتحرش تبدأ بالنظر المباشر أو الغير مباشر في أجزاء الجسم المختلفة للبنت بشكل حيواني, وينظر الشاب كل مرة لبنت مختلفة وكأنه لأول مرة يشوف بنت في حياته فنراه مثل الحيوان الذي يرى فريسته لإلتهامها. و التحرش مش بس بيجي من ولد لبنت على فكرة لا, لكن أحيانا أيضا البنت تبص وتتحرش بالولد برضه بطرق مختلفة علشان منظلمش الشباب و نسيب القلة القليلة من البنات اللي بيتحرشوا بالشباب, مثلا ” جيب شوية بنات كدة حلوين من نوع المتحرشين او اللي بيميلوا لده و حطهم في مكان سواء مفتوح أو مقفول مع ولد حلو كدة و عاجبهم, و إبقى قابلني لو شفتوه تاني ” طبعا ده مبالغ فيه شوية لكن في الحقيقة أكيد مش معظم البنات كدة خالص مش زي الشباب مثلا تلاقي معظمهم كدة و طبعا فيه ناس هتتفزلك عليا أو في الحقيقة على نفسها و هتقولك ” يا عم انا ببص للبنت بإعجاب أو لم هي بتعجبني ” فأكيد هرد و أقوله “حمرا” لإن لو واحد بيبص بنظرة إعجاب فعلا مش هيسأل نفسه أو هيقارن التحرش بالإعجاب أصلا, يا راجل ده حتى النظرة بتختلف يعني مثلا شوف الفرق بين واحد ممكن يكون معجب ببنت وواحد بيبص للبنت بنظرة تانية اللي احنا عارفنها دي, هتلاقي ان الولد او البنت اللي بتبص على الحد ده و معجبة بيه النظرة فيها سماحة كدة و نظرة إحترام لجمال الحد ده لكن مش نظرة متوحشة حيوانية !, و طبعا أنا في طبيعتي أتربيت في بيت اني احترم الحد الجميل اللي أسمه بنت أو الكائن الجميل اللي أسمه بنت أو ست أو أخت او أي حاجة من دي, وأكيد فيه زي كتييير اوي و ليه نحترم البنت دي مش هقلك بس علشان دي زي أختك أو الكلام الفاكس ده ” مع انها فعلا أختك ” لكن أيه مدى إستفادتك بعدما لمست أو بصيت للبنت دي بأي شكل من الأشكال ؟ … لو الموضوع مفيد و إنت شخصيا إستفدت قلنا طيب أستفدت أيه علشان يمكن نقلدك ولا حاجة, طيب أنت مبسوط من نفسك وإنت تقريبا زي الحيوان ؟ ” طبعا مش القارئ و لكن المُتحرش ولو كان المُتحرش من القراء يبقى الكلام ليك يا معلم ” ..

تفتكروا أيه هي أسباب التحرش ؟  .. واحد من الناس هيطلع فجأة من تحت الأرض زي الخازوق “اللي بيطلع دايما بعد السؤال ده” و هيقول يا معلم البنات هما اللي بيستفذونا لو لبسوا محترم مفيش حد هيبص عليهم أو هيلمسهم, طبعا في الحالة دي على طول برضه زي كل مرة هروح انا شاتمه و أقله وانت مال اهلك أساسا هي لابسة أيه إن شاالله تكون ماشية عريانة مالك انت ومالها ؟ وبعدين ياخي لو بيستفزوك متروح تتجوز واحدة تملى عينك أو يا عم روح شوفلك واحدة من إياهم أدفعلها فلوس وعيش وخد وقتك و هيكون برضاها كمان شوفت سهلة أوي لكن واحدة ماشية في الشارع مش لابسة حاجة انت مالك بيها وهي مطلبتش منك انك تبصلها اساسا !! .. يبقى في الحالة دي يا معلم عليك وعلى أول دكتور نفساني تعرفه ومطلعش أمراضك علينا ولو الدكتور معرفش يعلجك يبقى موت نفسك وريحنا منك وصدقني مش هتوحشنا خالص.

التحرش ده ليه أوقات كدة وبيقلب لتحرش جماعي يعني تقريبا كل سنة مرتين أو 3 مرات في مصر, معرفش ايه النظام في الأردن و لبنان أو أي دولة عربية تانية, لكن هنا في مصر في عيد الفطر وعيد الأضحى وشم النسيم تقريبا بتبقى فيه إحتفالات بالتحرش في المتنزهات والحدائق العامة و أحيانا الميادين كمان, يعني بيعملوا حالة هجوم جماعي على البنت الواحدة او البنتين واللي يلحق يعمل حاجة بيعمل تخيلوا بقى اللي بيحصل في البنت اللي بتقع تحت أيد الشباب في اليوم ده, تقريبا “بتمووووووووووت” ومن أشهر حادثه ” إحتفال ” بالتحرش كان في ميدان رمسيس في عيد من الأعياد يعني وكان الميدان كله تقريبا أكتر من 200 شخص عملوا عملية هجومية على بنت واحدة وكانت متصورة فيديو بس للأسف مش عارف أجيب الفيديو لأنه قديم جدا, و في سنة من السنين برضه كان فيه تحرش جماعي في وسط البلد وكانت حادثة مشهورة و كتب عنها مدونين كتير وقتها الدخلية نفت حدوث مثل هذه الأشياء, لكن مع إستمرار المدونين في الكتابة و معهم من الأدلة ما يثبت أخذت القنوات التلفزيونية و الجرائد الإهتمام بالموضوع أكثر فأكثر وبالمناسبة كانت القنوات بتاخد الصور اللي صورها المدونين و تنشرها بدون ذكر حقوق كمان!.. تخيلوا بقى قد أيه بتعاني البنت اللي بتنزل بدافع الفرح في العيد من الحفلات اللي بتتعمل عليها في الشارع هما يفرحوا لكن بيكون أسود يوم هي بتشوفه تقريبا, حتى لو هي نفسها في ده من كتر الولاد عليها هتكره اليوم اللي فكرت فيه انها نفسها في متحرش يتحرش بيها لول بقى, الناس لازم تفوق بقى شوية وتفهم ان البنت ملهاش اي علاقة باللي ممكن يحصل ده !

ومن إهتمام بعض العديد من الشباب المتضامنين بقى فيه حملات ضد التحرش وأفكار للتصدي لمثل هذه الأشياء القذرة فمثلا قامت بعض الفتيات والنساء بعمل موقع يسمى بخريطة التحرش الجنسي “http://harassmap.org” لمحاولة التصدي ومساعدة الضحية, و قام أخرون بعمل عدة تبرعات لنفس القضية مثلا قام فريق راب مصري “Arabian Knightz”  بالإشتراك مع شادية منصور وهي فنانة فلسطنية أيضا وعصام من فريق Outlandish, بعمل أغنية للمرأة المتضررة في وسط مجتمع ذكوري أو بمنطقة يسود بها التخلف حيث أن في مجتماعتنا حق المرأة مهدور فعلا ! و تسمى الأغنية التي قاموا بغنائها ” Sisters ” و التي يمكنكم سماعها من خلال هذا الفيديو التالي :

في الحقيقة قالوا الكثير والكثير في الأغنية دي اللي انا نفسي أقوله لناس كتير بجد.

طيب أزاي نحارب الظاهرة القذرة دي ؟ انا شايف ان احنا لو رجعنا للسبعينيات من القرن الماضي هنلاقي ان الستات كانت بتلبس اللي هي عايزاه هنا في مصر وبيلبسوا من غير هدوم تقريبا,  لكن مكانش فيه اي نوع من أنواع التحرش, فنيجي دلوقتي نلاقي ان اللبس بقى أكتر حشمة لكن بقى فيه ظاهرة جديدة و خطيرة تسمى التحرش  طيب هنعالج الموضوع ده إزاي برضه ؟ أولا الموضوع ده فأيد الحكومة و أهل الولد المتحرش والولد نفسه و البنت وأهل البنت وفأيد المجتمع ككل , كل واحد ليه دور ودور مهم كمان من الناس اللي قلت عليهم دول بما فيهم المجتمع اللي هو انا وانت يعني يعني مثلا, الحكومة تنزل قانون لردع “التحرش” وانا حاطه بين قوصين علشان انا عارف حكومتنا زكية شوية وممكن أمين شرطة رزل يوقف واحد وهو ماشي مع صاحبته فالمعلم ده ماشي مع صاحبته مش بيتحرش بيها يعني .. انما باقي الأفراد في الأسرتين يقوموا بالتوعية فبدل مثلا ما الأم تقول قدام أبنها من صغره ” أيه اللي بنت ديه لبساه ده و أيه المسخرة دي وايه الهبل ده ” أبوس أيدكم خليكم في نفسكم و علموا ولادكم ان اساسا مينفعش يدخل في اللي مالوش فيه وان البنت اللي ماشية في الشارع دي اخته وانه مالوش الحق في انه يتعدى على حريتها مهما كان التمن يدافع عن حريتها كمان مش العكس, وبالنسبة لأهل البنت يوعوها في كيفية التصرف في الظروف اللي زي دي مش يقلولها انتي اللي غلطانة وانتي اللي بتلبسي مش عارف ايه !.. ومن ناحية المجتمع لما نلاقي واحد بيعمل كدة ناخده على جامب وبراحة نكلمه معجبوش نفهمه معجبوش يبقى تطلبلوا الشرطة أو ظبطوا انت يا معلم وأديله واجبه, ولو كبير عليك شوية ومش هتعرف توصل لمرحلة الضرب وجو الأكشن ده يبقى خليك في الخيار الأول و استنى الشرطة ” طبعا انا بهزر في موضوع العنف ده ” .. و نيجي بقى في المدرسة وده الأهم ان احنا أولا مينفعش نخلي الولاد في مدرسة والبنات في مدرسة لازم يكون فيه عمليه إختلاط من الروضة لحد الجامعة ” لإن اساسا من الطبيعي هيكبروا و هيشتغلوا مع بعض كمان ” فمش فاهم أيه لازمة الفصل دي غير انها بتبوظ أخلاق الأطفال من صغرهم, واللي بيطالب بالفصل بينهم بيكون معقد نفسيا تماما و انا مأمن بكدة, لازم يتعلموا الأخوية كدة وأحترمهم لبعضهم و الولد يعرف قيمة البنت اللي معاه دي و ازاي يحافظ عليها و تكون مسئولة منه مش العكس… و أكيد فيه طرق تانية كتير لكن دي المشاكل الرئيسية اللي لازم نعالجها و فورا !.

شخصيا انا متأكد ان فيه كلام كتير ممكن يتقال, لكن أنت أو إنتي أيه رأيكم و هل تحبوا أحط أي إضافة تانية للتدوينة دي ؟

وأنا راجع باليل و مروح بيتي زي باقي البني آدم و ماشي و مبسوط وعمال بدور على القمر و هو في حالة الخسوف و كل شوية ابص على السما علشان في وسط البلد المباني عاليا شوية و مش لاقي أي قمر, و فجأة كدة وانا بسمع مزيكا و منسجم جدا و مبسوط عنيا راحت على مبنى مدرسة فرنسية كدة بسبب الجرافيتي ” الكتابة على الحائط ” الموجود و صدمت بعد ما شوفت المكتوب ان في ولو حتى واحد ما زال بيفكر بنفس الفكر ده, و بيقولك الحج ان أبناء مبارك قادمون, طبعا انا اللي فضلت أفكر فيه يا ترى من فين قادمون و أساسا هما أولاد مبارك أزاي ؟ هو مبارك للدرجة دي كان نسوانجي و بيعط كتير لهذا الشكل ؟

على العموم أنا مش عايز أدي الموضوع أكبر من حجمه علشان أنا مليون في المية ضد تكبير أحجام أي حاجة في الدنيا سواء مع تركيب سليكون أو نفخ, و الموضوع ميستهلش اساسا اني اكتب عنه بس انا قلت أرفه عنكم شوية و أضحكم معايا أو مهما كان شعوركم لكن هيكون شعور متبادل, و أنا إهتمامي الفترة الجاية نبص على المواضيع من برة مش من التفاصيل اللي جوة علشان من برة هتقدر تحدد عيوبك و تحلها لكن جوة هتفضل تمشي كتير لحد متلاقي عطل يضايقك و تصلحوا كل كتير أوي ولا أيه ؟

إنت شخصيا أيه رأيك نهتم بمين و بأيه ؟ و أيه رأيك في الناس دي ؟

ما زال هناك تعذيب حتى بعد الثورة

أنا مش هبتدي من أي حتة علشان مش لاقي بداية بس أنا هحكيلكم بطريقة عادية زي ما شفت بالظبط و هنشرلكم شوية صور من اللي صورتها برضه و طبعا قبل أي حاجة اللي هحكيه ده يوم 6 يونيو قدام وزار الداخلية بسبب وقفة تضامنية مع مرور سنة لموت الشهيد خالد سعيد و لم يتم محاكمة أي حد من المتهمين لحد دلوقتي…

أنا أول ما رحت كنت رايح لواحدي و كان الناس اللي واقفين شوية صغيرين بس كان صوتهم عالي جدا و أول ما قربت لقيت عساكر أمن مركزي واقفين عادي عاملين صف كدة على كل مدخل من مداخل الشوارع اللي حوالين وزارة التعذيب على العموم دخلت لحد موصلت للناس جوة وكانت هتافتهم قوية ضد العيسوس و المجلس العسكري و تضامنا مع الشهداء في الثورة و قبل الثورة في السجون و أمن الدولة و غيرهم شوية و ناس من الآلتراس الزمالك دخلو و شوية كمان و آلتراس أهلاوي دخلو و غنوا أغنية كدة لشتيمة الظباط و هبق أحطها في فيديو في أخر الموضوع المهم الناس بقوا يقولوا فجأة سلمية سلمية ” كأن الشتيمة بتسبب مثلا كسر في عظام الظباط ” المهم بقت الناس بتهتف و الناس بدأت تكتر بعد ما الشمس بدأت تختفي و أنضم لينا الناس اللي كانوا واقفين على كوبري قصر النيل تضامنا مع خالد سعيد برضه, و بدأت الهتافات تعلى أكتر ! .. و كان بيبص علينا من فوق شوية من اللي شغالين في الوزارة …

فجأة و لقينا بعض من الناس اللي واقفين بدأت بقى تعمل حاجة جميلة أوي و هي انهم بدأوا يرسموا على الحيطة صورة خالد سعيد مع بعض الكلمات المؤثرة تحت الصورة كدة وفي البداية بدأو على حوائط اللي قدام الوزارة كدة بعد شوية سمعنا الناس هيصت جدا في لقينا انهم بيرسموا على حيطة وزارة الداخلية و بدأت الناس كلهم بيصوروا و مبسوطين جدا بعد شوية واحد طلع على اللوجو من فوق و رسم برضه نفس الصورة فوق اللوجو و بدأو يعلقوا كمان بعض اليوفت اللي كانت الناس ماسكنها على اللوجو و حتى في حتى من اللوجو وقعت ف وقف شابين وعلقوها تاني مكانها !

و بعد شوية جيه الألتراس تاني و غانوا و علوا صوتهم جدا مع أغنيتهم اللي بيشتموا فيها الشرطة والمرة دي الناس غنت معاهم وأنا شخصيا مش شايف ان الشتيمة حاجة غلط أو عيب أو حاجة بدام مبتمسش الأهل يعني ده زائد ان لما مثلا تيجي تشتم قدام بنت يجي يقلك واحد فيه بنات يا كابتن على اساس انها جاية من الهند و مش عارفة الشتايم في مصر .. علشان الموضوع ميخرجش ويروح في حتة تانية, انا كنت مبسوط من الأغنية.. و علشان كدة انا صورتها وممكن تشوفها من الفيديو ده :

أما بالنسبة لشباب إئتلاف الثورة في معلش بقى العيال ديه سيس وبضان و ممكن أشتم فيهم للصبح.. وبحس ان العيال دي بقت شوية عيال بيستخدمهم المجلس و الحكومة علشان لما الناس تنزل مظاهرة المظاهرة تبق كارنيفال تبتدي في معاد و تتهي بمعاد علشان شباب السيس عايزين كدة .. فجأة بقى هما القيادة بتاعت الثورة و قيادة بتاعتنا! .. على العموم جيه واحد من الناس دي و بيقلنا لازم نمشي الساعة 8 أكيد بقى هاه .. طبعا زي يوم 27 مايو لما قالو الناس أخرها في الميدان الساعة 6 أي حد بعد كدة هيكون بلطجية و مخربين .. طبعا هقلها بدالك و هي احا ! …

على العموم ده كان اليوم بإختصار شديد و مش هقلكم بقى قد ايه اليوم ده كان جامد جدا و غيره لكن على كل حال ربنا يرحم كل شهدائنا جميعا و ان شاء الله ربنا يجيب لكل أم شهيد حق إبنها بالعدل 🙂

%d مدونون معجبون بهذه: