Category: يوميات شاب


الفترة اللي فاتت بنسمع كتير ان الحركة الفلانية بتتمول وان النشطاء بيتمولوا والمجلس العسكري بيحقق في حسابات النشطاء في البنوك وهكذا وتستمر التمثيلية على الشكل ده و بالرغم من كل ده مفيش أي دليل على تمويل النشطاء أو حركة تأخذ تمويل من أي حد, و الغريب ان المجلس العسكري أو الحكومة أيضا لم تعتذر حتى كتابتي للسطر ده لكل من وجه لهم هذه الإتهامات.. ولكن الشارع بيصدق ان الحركة الفلانية وحشة وان فعلا بتتمول وقال ايه علشان توقع مصر .. لدرجة ان شباب صحابي كانوا عامليين مظاهرة طلابية أمام وزارة التربية والتعليم .. ظهرتلنا إحدى العاملات بالوزارة هي وزميلتها وشايفة ان الشباب ده تافه, وسألتني مين اللي ممولكم وإنت ليه شايل الكاميرة دي !!

للدرجة دي بقينا بنخون بعض ؟ .. هنعتبر ان كل الناس والإئتلافات والحركات دي فعلا ممولة وكل الهرتلة دي صح, تعالوا نشوف هما ايه موقفهم من كل حاجة, بيدافعوا عن اي قضية ؟ .. هل ليهم حق ولا لا ؟ ولو لا ملهمش حق يدافعوا عنها طيب لا ليه ومين اللي يدافع عن القضية دي ؟ أو ايه حلولك إنت ؟ وهل أصلا لو الناس دي بتدعي هل فعلا البلد زي الفل وان اللي بيعملوه ده اصلا محتاج تمويل ولا كل اللي يهمهم ان يشوفوا مصر دي أحسن وأحلى بلد وبيدفعوا دمهم تمن ده, يمكن أنا بلاقي مثلا ناس كتير أعرفها تيجي تقولي “انتوا” عايزين ايه تاني ؟ بتنزلوا ليه مظاهرات تاني ؟ وإن احنا ناس فاضية ومورناش حاجة وبنعمل كدة علشان نخرب البلد … طيب بما اننا فاضيين .. حضرتك بتعمل ايه طول وقتك ؟ أراهنكم ان الناس اللي بتقول كدة دي أكتر ناس فاضية ووقتهم كله خروجات وتلفزيون وماتشات ! .. مش معنى كدة ان الناس دي مبيحبوش البلد كلنا بنحب مصر لكن لو انت مش عايز تشارك في التغير يبقى خلينا احنا نغير ونجيب حق ناس ماتت علشان تجبلنا كرامة علشان تجبلنا أكل علشان تجبلنا حرية مش علشان انتخابات ! … احنا تهمنا كرمتنا علشان كدة بندافع عنها يهمنا حريتنا وبندافع عنها يمكن احنا مش مستعجلين والناس شايفة ان احنا مستعجلين ولكن في الحقيقة الناس دي اللي قاعدة في بيتها هما اللي مستعجلين على الأمن قبل الكرامة وقبل كل حاجة, هما اللي دايما يقولوا هي الثورة عملت ايه ! .. احنا الناس اللي هتكمل المسيرة للآخر .. هما الناس اللي عندها يأس او الناس اللي ضد الثورة أصلا أو أيا كان .. المهم ان كلنا بنحب مصر ولازم نثق في بعض ومش عيب لما حد يسمع للتاني ويفهم انه غلط ومش عيب لما ندور على دليل على حاجة قبل ما نصدقها ونساعد في نشر الإشاعات !

وأصلا أيه أكتر مؤسسة بيدخلها فلوس في مصر ؟.. ليه نفس المؤسسة هي اللي بتتكلم عن الشباب الممول وهما أصلا الأكتر تمويلا, تعالوا نشوف مين بيتمول بيحب مصر ومين بيتمول عايز فلوس ومين بيتمول من أبوه وأمه ومين بيمول نفسه بنفسه 🙂 …. ” تعالوا كلنا نمول بعض بالأمل ونمول بعض بالحب ونمول بعض بالدفاع عن ارضنا وحريتنا وكرامتنا وشرفنا بدمنا ” .. في حب مصر هنختلف ولكن هنوصل لأحد المراسي ببلدنا, لا يوجد مراسي للخراب او للفقر او للجوع .. ولكن هناك مرسى لعدم الكرامة والتقيد وعدم احترام السلطات لحياة المواطنين الخاصة وانتهاك حريتهم الشخصية ووحشية جهاز الأمن ضد المواطنين بهدف تحقيق الوهم “الأمن” … ومرسى للحب والسلام احترام حقوق المواطن وحق المواطنة وعدالة اجتماعية وتوازون إجتماعي, وقلة الفقر وامن وامان مع إحترام المواطنين بالداخل والخارج ورخاء وهكذا … فأي مرسى تريده ؟ … يلا ندافع عن بلدنا قبل ما يفوت الأوان.

صباح الخير, النهاردة اليوم طويل ولكن أتمنى يكون مفيد بالنسبة ليا وللناس كلها, النهاردة الساعة 6 أنا هكون موجود في التحرير لونج “ملتقى ثوار التحرير” بمعهد جوتا لحضور “ندوة عن الدستور المصري”  و المتحدث هو المهندس  عمرو سميح طلعت, مدير عام شركة IBM.

ده إقتباس من البيانات الموجودة في صفحة الحدث :

يتشرف التحرير لاونج بدعوتكم لحضور ندوة عن
تاريخ الدستور فى مصر
يوم ١٨ يونيو ٢٠١١
لقاء مع المهندس / عمرو سميح طلعت
يعمل مدير عام شركة IBM،
فضلاً عن تدريس علم الإدارة والتسويق بكلية الهندسة جامعة القاهرة، وهو فى الوقت ذاته مؤرخ متخصص فى تاريخ مصر المعاصر، له العديد من المؤلفات والأبحاث المنشورة فى الكثير من القضايا والأحداث والشخصيات الهامة فى تلك الحقبة، يتناولها من زاوية علمية محايدة بما لها وما عليها، كان آخرها كتاب "سعديون أم عدليون" عن ثورة 1919.
الساعة 6 مساء ٥ شارع البتسان التحرير لاونج فى جوت

و بما ان النهاردة اليوم طويل و مثمر ان شاء الله و أنا منمتش لحد دلوقتي ومحتاج انام بس خايف يضيع عليا المعاد ده, مش بس علشان أستفاد لكن انا هحاول أنقل لكم الندوة بالصور وإن أمكن بالفيديو كمان علشان اللي مش هيحضر فيكم يبقى كأنه حضر, و اللي عايز يجي يحضر يا ريت يتفضل و يحضر معايا وبالمرة اتعرف على الناس اللي متبعاني علشان أكيد هيكون ده شرف ليا, و بالنسبة للصفحة على الفيس بوك للمشاركة ومعرفة باقي التفاصيل هي : http://goo.gl/w4elj

أتمنى أتي أشوفكم هناك.

وأنا راجع باليل و مروح بيتي زي باقي البني آدم و ماشي و مبسوط وعمال بدور على القمر و هو في حالة الخسوف و كل شوية ابص على السما علشان في وسط البلد المباني عاليا شوية و مش لاقي أي قمر, و فجأة كدة وانا بسمع مزيكا و منسجم جدا و مبسوط عنيا راحت على مبنى مدرسة فرنسية كدة بسبب الجرافيتي ” الكتابة على الحائط ” الموجود و صدمت بعد ما شوفت المكتوب ان في ولو حتى واحد ما زال بيفكر بنفس الفكر ده, و بيقولك الحج ان أبناء مبارك قادمون, طبعا انا اللي فضلت أفكر فيه يا ترى من فين قادمون و أساسا هما أولاد مبارك أزاي ؟ هو مبارك للدرجة دي كان نسوانجي و بيعط كتير لهذا الشكل ؟

على العموم أنا مش عايز أدي الموضوع أكبر من حجمه علشان أنا مليون في المية ضد تكبير أحجام أي حاجة في الدنيا سواء مع تركيب سليكون أو نفخ, و الموضوع ميستهلش اساسا اني اكتب عنه بس انا قلت أرفه عنكم شوية و أضحكم معايا أو مهما كان شعوركم لكن هيكون شعور متبادل, و أنا إهتمامي الفترة الجاية نبص على المواضيع من برة مش من التفاصيل اللي جوة علشان من برة هتقدر تحدد عيوبك و تحلها لكن جوة هتفضل تمشي كتير لحد متلاقي عطل يضايقك و تصلحوا كل كتير أوي ولا أيه ؟

إنت شخصيا أيه رأيك نهتم بمين و بأيه ؟ و أيه رأيك في الناس دي ؟

انا كنت هناك في مقر اللجنة تقريبا الساعة ٩،١٠ الصبح، وانا في طريقي للجنة الاخوان متجمعين في كل حتة والشوارع المؤدية للجنة و تقريبا مكانش فيه حد بيروح كتير في الوقت ده المهم دخلت مكانش فيه حد واقف لسة في طابور ولا اي حاجة، المهم اول ما دخلت واحد شاورلي و قالي تعالى هنا فبعد كدة رحتله و إدتله البطاقة و فضل يكتب بياناتي و قالي تعالى امضي، مضيت انا و أدالي ورقة الاستفتاء و قالي روح ورأ الستارة دي و علم على موافق او مش موافق المهم رحت و أكيد رحت عملت مش موافق طبعا و رحت عند الراجل و جمبه القاضي قالي طبق الورقة و حطها في الصندوق فإتاكدت ان الصندوق مقفول كويس و حطيتها وقالي حط صباعك في الحبر ده و حطيت صباعي و اخدت بطاقتي و طلعت مشيت، فخرجت بإتجاه تاني غير بتاع بيتي علشان أشوف الاخوان لقيتهم مشاء الله و الله اكبر عدد كويس واقف في حتت مختلفة و اي حد رايح اتجاه اللجنة يقلولوا نعم لازم تعمل نعم المهم قت عديها و رحت مكمل أجيب المصري اليوم و رجعت متعمد من عند المدرسة المهم رحت اتلاقيت الطريق فاضي مفيش إخوان غير عند المدرسة من برة بعدد قليل !!، روحت كدة أشوف قرايبي اللي اعرفهم في المكان و قعدت شوية عند خالي رجعت تاني في اتجاه المدرسة في طريقي لواحد صاحبي، و ما شاء الله لقيت الاخوان عملين حافلة و جايبين دي چاي و لما رجعت بصاحبي كانوا مشغالين أغاني وطنية لول المهم كنت مخبي صباعي في الجريدة ف واحد ناده علينا فبعدما في جدال طويل و هو بق عمال يلف حوالين الأسئلة جيه ناس اخوانجية تانين المهم عملوا عليا حفلة لول عملوا دوراية كدة و و انا لواحدي حسيت أني رامبوا او ماريو لول المهم كل ما واحد ينسحب يجي غيره هههه المهم انسحبوا كلهم رحت بق للمدرسة انا و صاحبي و قابلنا واحد صاحبي تالت و رحنا وقفتهم في المرور و اقنعت واحد شيخ لما هو أتناقش معاية في حوار المادة التانية ده ان التعديل مالوش علاقة بيه و ان أكيد اللي هيحطو دستور مش من الكفار لول المهم لاقيت واحد بيقلهم لازم تعملوا نعم رحت مزعقله و قلتله م كل واحد يخليه في حاله احسن و كل واحد يحترم رأي الناس المهم يعني اتكلمت كدة بسبب ان معظم اللي واقفين اساسا داخلين مش عارفين ايه موقفهم ! ما علينا بأعلي كام اخ من الاخوان و يقلي عندك حق و واحد تاني يقلي كل واحد يقول اللي عايزه و كله جاي عارف هيقول ايه قلتله ماشي بس متجيش تلزمني و تقولي لازم إحنا مش عايزين وطني تاني المهم قلبت دراما و انا بدأت أتغر من أني بقيت معرفهم غلطهم لول و بعد كدة خرجت لقيت ابويا واقف مع محامي المعلم طلع من الاخوان بعد مشتمت شوية وبدا يدافع عنهم المهم عرفت ارد عليه و بدأت اسئله نفس أسئلة اللي بحب ازنقهم بيها و كان رده سلبي انسحب و جيه غيره و فضلنا على نفس الحال كان اهم حاجة بتخليهم ينسحبوا هو اي بسألهم انتم كل اختلافي معاكم دلوقتي في أنكم بتفرضوا رأيكم و ان انا معنديش اعتراض على اي نعم او لا و لكن على الاسلوب الوسخ في اقناع الناس البسيطة اكتر !! المهم أخد الحوار وقت كبير اكتر من خمس ساعات هههه المهم قلبت بواحد ليحملها انا و صاحبي عن تاريخ الاخوان و فضل يقلي انا مقتنع بكلامك بس مش معنى كدة ان كل الاخوان وحشين وبتاع و بعد ده كله روحت و انا مبسوط ان من اكبرهم لاصغرهم صحقتهم مش علشان انا صح لكن علشان انا اللي كنت بقوله كان كلام ليه أسس من اكتر من دكتور و مستشار و تحليلات كتيرة عامة و خاصة ! فقدرت ارد عليهم علشان هنا على غلط بسبب لعبتهم الوسخة في استغلال الناس ! و ده كان يوم السيناريو و حوار الاخوان الي بقوا مصلحتك اولا هما كمان هههه اهلا بالوطني من جديد، و أوحش حاجة و هما بيقولوا المسيحين هما اللي بيعملوا لا هههه.

كفاية كدة علشان بجد تعبت انا عمال بكتب من الموبايل تاني و معلش انا عديت كام حاجة ممكن علشان نسيت على العموم اللي ربنا عايزه هيكون ؛)

بعد شوية انا هنزل و اروح لجنة الاستفتاء الأقرب لبيتي و هنزل أكيد هقول لا على التعديلات الدستورية و اللي انا في الحقيقة يسميها ترقيعات دستورية على دستور منتهي الصلاحية، و مينفعش لدولة في مكانة مصر في الحقيقة ولا حتى في مكانة اي دولة تانية، لإن في المجمل كدة الصلاحيات الدستورية و القانونية بتاعت الدستور ده بتدي للرأيس صلاحيات قائد للأغنام مع العلم ان شعب مصر مينفعش يكون ليه قائد ولا حتى اي شعب برضه لان الشعب دائماً هو السيد مش العكس و أكيد مينفعش مصير شعب بحاله يكون في ايد شخص واحد والله اعلم قد ايه ممكن تكون القوة العقلية لهذا الشخص ! و إدينا جربنا ٣٠ سنة يعني إحنا عندنا خبرة اساسا في موضوع التلبيس في الحيط ده و أكيد فيه مصطلحات تانية تنفع للحوار ده و في الحالة دي بس انا هقول الكلام المحترم احسن علشان كل واحد يحط المصطلح اللي عنده، على العموم انا دخلت في بير غويط مش هخلص لو فضلت اتكلم فيه المهم أنكم عرفتم ان ليه لا مش نعم !!

اما دلوقتي بق عايز اقلكم انا مش عارف أنام من امبارح و عايز يكون ليا الشرف علشان اكون من اوائل الناس اللي دخلت اللجان و قالت لا و لا و لا و كمان علشان انا مستني اليوم ده من زمان علشان لاول مرة احس ان صوتي هيتحسب مش هيعلى عليه صوت تاني او اصلا يزوره و يقول كلام مقلتوش انا في الورقة اول مرة احس أني رايح اقول حاجة بقلمي اول مرة احس أني دلوقتي و انا رايح هكون شامم ريحة و معنى الحرية و ان إد ايه صوتي هيكون ليه فرق و ربما يكون جزئ او أكيد في تغير مصر و ان شاء الله للاحسن اول مرة هحس ان بطاقتي الشخصية ليها لازمة و انها طلعت على حاجة مفيدة و هي كمان شمت ريحة الحرية !.

انا على فكرة دلوقتي و قبل مروح في اي حتة بكتب من الموبايل و ده اول مقال اكتبه و اعتقد ان مفيش حد هيقراه لان انا لسة اصلا عامل الاكاونت ده و اصلا أكيد الناس نايمة حتى صحابي اللي هاخد رأيهم فيه بس انا اعتقد في جميع الأحوال هنشره علشان كلامي كمان يشم ريحة الحرية ولا ايه ؟ على العموم انا نازل دلوقتي حان الان موعد الاستفتاء، قلمي و بطاقتي وعقلي معاية الحمدلله، ف اشوفكم بعدين ان شاء الله و يا رب ربنا يحفظ مصر و ولادها و بناتها كل اهلها !.

%d مدونون معجبون بهذه: